RSS Chief Mohan Bhagwat: సాంకేతికతకు మానవుడే యజమాని కావాలి
హైదరాబాద్ శివార్లలోని కన్హా శాంతి వనం (Kanha Shanti Vanam) లో నిర్వహించిన 7వ అంతర్జాతీయ శిబిరం ఘనంగా ముగిసింది. ఈ కార్యక్రమానికి 79 దేశాల నుంచి ప్రతినిధులు హాజరుకాగా, ఆర్ఎస్ఎస్ చీఫ్ మోహన్ భగవత్ (RSS Chief Mohan Bhagwat) ముఖ్య అతిథిగా పాల్గొన్నారు.
ఈ సందర్భంగా మోహన్ భగవత్ మాట్లాడుతూ, భారతదేశం మళ్లీ ‘విశ్వగురు’గా ఎదగడం వ్యక్తిగత ఆశయం మాత్రమే కాదని, ప్రస్తుత ప్రపంచానికి అవసరమని వ్యాఖ్యానించారు. నేటి ప్రపంచం ఎదుర్కొంటున్న సమస్యలకు భారతీయ ఆలోచనా విధానం, జీవన విలువలే సరైన మార్గదర్శకత్వం ఇవ్వగలవని తెలిపారు.
విశ్వగురువుగా భారత్ ఎదగడం ప్రపంచ అవసరం
భారతదేశం విశ్వగురువుగా ఎదగాలన్న లక్ష్యాన్ని సాధించేందుకు సంఘ్ (RSS) వంటి అనేక సంస్థలు నిరంతరం కృషి చేస్తున్నాయని మోహన్ భగవత్ వెల్లడించారు. వ్యక్తిత్వ వికాసం ద్వారా సమాజంలో సానుకూల మార్పు తీసుకురాగల వ్యక్తులను సంఘ్ తయారు చేస్తోందని వివరించారు.
క్రమశిక్షణ, కష్టపడి పనిచేయడమే మార్పుకు మూలం
సమాజంలో మంచి మార్పు రావాలంటే క్రమశిక్షణతో కూడిన హార్డ్ వర్క్ అవసరమని, మాటలతో కాకుండా మన చర్యల ద్వారానే దాన్ని నిరూపించాల్సిన అవసరం ఉందని ఆయన పిలుపునిచ్చారు. ప్రతి వ్యక్తి తన బాధ్యతను గుర్తించి పనిచేస్తే దేశం సరైన దిశలో ముందుకు సాగుతుందని అన్నారు.
సాంకేతికతపై మానవ నియంత్రణ అవసరం
ప్రస్తుత డిజిటల్ యుగంలో సాంకేతికతకు మానవుడే యజమాని కావాలి, మానవుడు సాంకేతికతకు బానిస కావద్దని మోహన్ భగవత్ ఆకాంక్ష వ్యక్తం చేశారు. టెక్నాలజీ మానవ సంక్షేమానికి ఉపయోగపడాలే తప్ప, మన జీవన విలువలను దెబ్బతీయకూడదని సూచించారు.
ఈ అంతర్జాతీయ శిబిరం ప్రపంచవ్యాప్తంగా భారతీయ సంస్కృతి, విలువలపై అవగాహన పెంచే దిశగా కీలక పాత్ర పోషించిందని నిర్వాహకులు తెలిపారు.
మరిన్ని Latest News వార్తల కోసం ఇక్కడ క్లిక్ చేయండి.
