Jonnawanda Park: జొన్నబండలో పార్కును కాపాడిన హైడ్రా
1444.40 గజాల పార్కు స్థలానికి ఫెన్సింగ్ – స్థానికుల ప్రశంసలు
మేడ్చల్–మల్కాజిగిరి జిల్లా, ఓల్డ్ ఆల్వాల్ పరిధిలోని జొన్నబండ ఎంహెచ్ఆర్ కాలనీలో ఉన్న పార్కును హైడ్రా (HYDRAA) కాపాడింది. మొత్తం 1444.40 గజాల విస్తీర్ణం కలిగిన పార్కు స్థలం చుట్టూ ఫెన్సింగ్ ఏర్పాటు చేసి అక్రమాల నుంచి రక్షణ కల్పించింది.
లే అవుట్ ప్రకారం సర్వే నంబర్లు 575, 576 (పార్ట్), 577, 578 (పార్ట్), 598 మరియు 580 (పార్ట్) లలో ఈ స్థలాన్ని పార్కు కోసం కేటాయించినట్లు అధికారులు నిర్ధారించారు. అయితే కొంతమంది అక్రమంగా ఆక్రమించేందుకు ప్రయత్నిస్తున్నారని స్థానికులు హైడ్రా ప్రజావాణికి ఫిర్యాదు చేశారు.
ఫిర్యాదులపై స్పందించిన హైడ్రా కమిషనర్ శ్రీ ఏవీ రంగనాథ్ గారి ఆదేశాల మేరకు, సంబంధిత అధికారులతో కలిసి హైడ్రా బృందం క్షేత్రస్థాయిలో పరిశీలన చేపట్టింది. పరిశీలనలో ఈ భూమి పూర్తిగా పార్కు స్థలమేనని నిర్ధారణ కావడంతో గురువారం ఫెన్సింగ్ పనులు చేపట్టింది.
ప్రజలకు ప్రాణవాయువు అందించే పార్కును అక్రమాల నుంచి కాపాడిన హైడ్రాకు స్థానికులు కృతజ్ఞతలు తెలిపారు. ఇకపై చెత్త వేయకుండా, వెంటనే ఈ స్థలాన్ని పూర్తి స్థాయి పార్కుగా అభివృద్ధి చేయాలని **జీహెచ్ఎంసీ (GHMC)**ని కోరనున్నట్లు వారు తెలిపారు.
మరిన్ని Telangana News వార్తల కోసం ఇక్కడ క్లిక్ చేయండి.
