Telangana CEO Sudarshan Reddy: తెలంగాణ సీఈఓ సుదర్శన్ రెడ్డి బెల్జియం పర్యటన
తెలంగాణ రాష్ట్ర ప్రధాన ఎన్నికల అధికారి (సీఈఓ) శ్రీ సి. సుదర్శన్ రెడ్డి ఎన్నికల నిర్వహణలో సహకారాన్ని మరింత బలోపేతం చేయడం, అంతర్జాతీయ ఉత్తమ పద్ధతులను అధ్యయనం చేయడం లక్ష్యంగా మూడు రోజుల అధికారిక పర్యటన నిమిత్తం బెల్జియంకు బయలుదేరారు.
ఈ పర్యటనలో భారత ఎన్నికల సంఘం (ఈసీఐ) మరియు బెల్జియన్ ఫెడరల్ పబ్లిక్ సర్వీస్–ఇంటీరియర్ మధ్య ఎన్నికల నిర్వహణకు సంబంధించిన ఉత్తమ విధానాల మార్పిడి జరగనుంది. ముఖ్యంగా ఎన్నికల ప్రక్రియల్లో పారదర్శకత, సమగ్రత, సామర్థ్యాన్ని పెంపొందించడంపై ఈ పర్యటన దృష్టి సారించనుంది.
సీఈఓ సుదర్శన్ రెడ్డి నేతృత్వంలో ఐదుగురు సభ్యులతో కూడిన అధికారుల బృందం ఈ పర్యటనలో పాల్గొంటోంది. ఈ ప్రతినిధి బృందంలో ఖమ్మం జిల్లా కలెక్టర్ మరియు జిల్లా ఎన్నికల అధికారి అనుదీప్ దురిశెట్టి, రాష్ట్ర శిక్షణా నోడల్ అధికారి మరియు సీఈఓ కార్యాలయ ప్రత్యేక గ్రేడ్ డిప్యూటీ కలెక్టర్ బోయపాటి చెన్నయ్య, ఇబ్రహీంపట్నం అసెంబ్లీ నియోజకవర్గ ఎన్నికల రిజిస్ట్రేషన్ అధికారి కంకినాల అనంత రెడ్డి, నాంపల్లి అసెంబ్లీ నియోజకవర్గం పోలింగ్ స్టేషన్ నెం. 97 బూత్ స్థాయి అధికారి వేముల ధ్రువ కుమార్ రెడ్డి ఉన్నారు.
బెల్జియం పర్యటనలో భాగంగా ఎన్నికల సాంకేతికత, ఓటర్ సేవలు, శిక్షణ విధానాలు, పోలింగ్ నిర్వహణ వంటి అంశాలపై చర్చలు జరగనున్నాయి. ఈ అనుభవం తెలంగాణలో ఎన్నికల నిర్వహణను మరింత సమర్థవంతంగా చేయడంలో ఉపయోగపడుతుందని అధికారులు భావిస్తున్నారు.
ఈ పర్యటన ద్వారా అంతర్జాతీయ స్థాయిలో ఎన్నికల నిర్వహణలో అనుసరించదగిన ఉత్తమ పద్ధతులను తెలంగాణ రాష్ట్రంలో అమలు చేసే దిశగా కీలక ముందడుగు పడనుందని సీఈఓ కార్యాలయం తెలిపింది.
మరిన్ని Telangana News వార్తల కోసం ఇక్కడ క్లిక్ చేయండి.
