BRS Signature Campaign: బీఆర్ఎస్ లక్ష సంతకాల ఉద్యమానికి శ్రీకారం
తొలి సంతకం చేసిన బీఆర్ఎస్ వర్కింగ్ ప్రెసిడెంట్ కేటీఆర్
హైదరాబాద్: సికింద్రాబాద్ కంటోన్మెంట్ బోర్డును గ్రేటర్ హైదరాబాద్ మున్సిపల్ కార్పొరేషన్లో విలీనం చేయాలనే డిమాండ్తో బీఆర్ఎస్ పార్టీ లక్ష సంతకాల సేకరణ కార్యక్రమాన్ని ప్రారంభించింది. ఈ బృహత్తర ఉద్యమానికి మద్దతుగా తొలి సంతకాన్ని బీఆర్ఎస్ వర్కింగ్ ప్రెసిడెంట్ శ్రీ కల్వకుంట్ల తారక రామారావు (కేటీఆర్) చేశారు.
ఈ సందర్భంగా బీఆర్ఎస్ నేతలు మాట్లాడుతూ, కంటోన్మెంట్ విలీన అంశాన్ని కొందరు రాజకీయ డ్రామాగా మార్చి ప్రజలను గందరగోళానికి గురి చేస్తున్నారని విమర్శించారు. విలీనంపై దీక్షలు ప్రారంభించి, ఆ తర్వాత అకస్మాత్తుగా విరమించిన వారు దీక్ష ఎందుకు మొదలుపెట్టారు? ఎందుకు ఆపేశారు? అనే అంశాలపై ప్రజలకు ఇప్పటివరకు స్పష్టత ఇవ్వలేదన్నారు.
కంటోన్మెంట్ విలీనం అనేది ప్రజల సమస్య అని, ఇలాంటి కీలక అంశాలపై పోరాటం చేపట్టేటప్పుడు పార్టీలకు అతీతంగా అందరినీ కలుపుకొని ఐక్యంగా ముందుకు సాగాల్సిన అవసరం ఉందని బీఆర్ఎస్ నేతలు పేర్కొన్నారు. కానీ, స్పష్టమైన రోడ్మ్యాప్ లేకుండా వ్యవహరించడం వల్ల ప్రజల్లో అయోమయం పెరుగుతోందని ఆవేదన వ్యక్తం చేశారు. విలీనంపై బీజేపీ సహా వివిధ వేదికలపై భిన్నమైన వ్యాఖ్యలు రావడం కూడా ప్రజల్లో సందిగ్ధతకు కారణమవుతోందన్నారు.
కంటోన్మెంట్ విలీనాన్ని వ్యతిరేకిస్తున్నట్లు ఈటల రాజేందర్ చేసిన వ్యాఖ్యలు, స్థానిక బీజేపీ మొదటి నుంచి అనుసరిస్తున్న వ్యతిరేక వైఖరిని స్పష్టంగా చూపిస్తున్నాయని బీఆర్ఎస్ ఆరోపించింది. మరోవైపు, ఎనిమిది రోజుల పాటు సాగిన దీక్షకు కనీసం ఒక్క కాంగ్రెస్ మంత్రి కూడా హాజరుకాకపోవడం, అకస్మాత్తుగా ఎమ్మెల్యే శ్రీ గణేష్ దీక్ష విరమించడం చూస్తే ఇది కేవలం రాజకీయ స్టంట్ మాత్రమేనని విమర్శలు చేశారు.
బీఆర్ఎస్ ఆధ్వర్యంలో లక్ష సంతకాల సేకరణ పూర్తి చేసిన అనంతరం, ఆ సంతకాల పత్రాలను కేంద్ర మంత్రి ఈటల రాజేందర్కు, కేంద్ర రక్షణ శాఖ మంత్రి శ్రీ రాజ్నాథ్ సింగ్కు, కాంగ్రెస్ నాయకుడు శ్రీ రాహుల్ గాంధీకి పంపించనున్నట్లు తెలిపారు. తద్వారా కంటోన్మెంట్ ప్రజల్లో ఉన్న బలమైన ఆకాంక్షను జాతీయ స్థాయిలో తెలియజేస్తామని స్పష్టం చేశారు.
కంటోన్మెంట్ విలీనాన్ని కోరుకునే ప్రతి ఒక్కరూ పార్టీలకు, సంఘాలకు అతీతంగా ఈ లక్ష సంతకాల ఉద్యమానికి మద్దతు ఇవ్వాలని బీఆర్ఎస్ విజ్ఞప్తి చేసింది.
మరిన్ని Telangana Politics వార్తల కోసం ఇక్కడ క్లిక్ చేయండి.
